Eulodia Dagua, "The Sound of the Cicada."

[Rimay chi dzhili mama chuku yura..] Chiga kallary urasta chuku runa chari ajashka chiga runa aka payga ashka tinajagunata churashaga azuwasa upiajashka. Chi upik ashkaybi kasna gunata ashka runata sipay paya kayagarasha. Chi kayashaga upiashka chasna upisha pay tiakjashkay payga ña nishkaya ña "ñukaga kunaga mana runacha sakyringarawni". "Ñukaga kunaga mashti chuku ruyami tukuy runa imashinata upiganura, Chashallatami ñukata upinwana nijashka ñuka sisa tukusha sayarikpi." Chiga chasna nisha nikpi chi shukunaga chi azuwata upinga shamun runaguna "mayta kanga kasna tukungi" nisha niskawna "Mana nishkay kuna rikungichi ñuka tukushkaybi kaunguna kanguna rikusha llakyringarawngichi" nisha. Chasna nikpiga chiga chasna chi runagunata payga ña azuwata churasha kayaj ashka chiga chasna kwintarisha shuk pusha kayakpiga pay. Chiga payna paktanunpari ñuka tukungarawni ñuka "shimm..." nishkaybiga. Nishkaybiga ñukataga tukuy chi mashty ñukata imashita ñuka runa ashkay upinaknawra chasnallatamy ñukaga ñuka "shim" nishkay "sisarisha sayasha" nisha nishkaya. Chiga pay chasnaga ña chi runaga chasnaga rikukpiga cierto changaya nisha pay shamusha nikpiga chasna tukusha shayarishka tukuk. Chiga runamanda chi tukuk ashka chi chukuk runa asha ashkamanda chasna nisha ñukanchi kwintachiwanchi.